Қазақстанда 5 млн 13 мың 64 адам коронавирусқа қарсы екпені толық алды, деп хабарлайды inbusiness.kz.
Денсаулық сақтау министрлігінің мәліметінше, 22 тамызда COVID-19-ға қарсы вакцинаның бірінші компонентін 6 млн 369 мың 263 адам, екінші компонентін 5 млн 13 мың 64 адам салдырған.
Өткен тәулікте коронавирус жұқтырудың 6 314 дерегі тіркелді. Осылайша, COVID-19 жұқтырғандар саны 743 220 жетті.
5 мың 97 адам коронавирустан айықты. Пандемия басталғалы елімізде 615 816 адам COVID-19-дан емделіп, сауығып шықты.
23 тамыздағы мәлімет бойынша 124 871 адам коронавирустан емделіп жатыр.
"Олардың ішінде 30 197 пациент стационарда, 94 674 науқас амбулаториялық деңгейде ем қабылдауда. 1 944 адамның жағдайы ауыр, 518 пациенттің жағдайы өте ауыр, 312 науқас өкпені жасанды желдету аппаратына қосылған", - деп жазылған хабарламада.
Сондай-ақ коронавирус пен пневмониядан 137 адам қайтыс болды.
2021 жылғы 23 тамыздағы жағдай бойынша Қазақстан өңірлеріндегі эпидемиологиялық ахуалды бағалау матрицасы төмендегідей:
"Қызыл аймақта": Нұр-Сұлтан, Алматы, Шымкент қалалары, Ақмола, Ақтөбе, Алматы, Атырау, Батыс Қазақстан, Жамбыл, Қарағанды, Қостанай, Қызылорда, Маңғыстау, Павлодар, Солтүстік Қазақстан және Шығыс Қазақстан облыстары.
"Жасыл аймақта": Түркістан облысы.
