Елімізде алимент төлемеген әкелердің берешегі 7 миллиардқа жетті. Сот орындаушылары қыруар қаржыны қалай өндірерін білмей дал. Қазір 300 мыңнан астам іс олардың кабинетінде шаң басып жатыр, деп хабарлайды КТК арнасы.
Өйткені, жауапсыз әкелердің көбі денсаулығым сыр берді, жұмыс таппадым деген сан сылтау айтады екен. Ал пәтер, көлік пен дүние-мүлкін туыстарының атына жазып қойған. Бір сөзбен айтқанда, заң жүзінде дымы жоқ. Сондықтан сот орындаушылары олардан соқыр тиын да өндіре алмай діңкелеп жүр.
Мәжілісте мемлекеттік алимент қорын құру мәселесі қайта сөз болды. Яғни, ұл-қызына бір тиын да татырмайтын азаматқа ақшаны үкімет беріп, кейін шығын жауапсыз әкелерден өндірілмек. Бірақ, оның қайтарымы болатынына күдік бар. Әрі оған бюджеттің миллиондары қажет. Әзірге баласына алимент төлеуді парыз емес, қарыз деп түсінетіндермен күрес күшейтілмекші.
"Алименттен жалтарған әкелер көп. Арасында қымбат көлік мініп, шетелге демалуға баратындар бар. Міне осындай ерлерді әкімшілік тіпті қылмыстық жауапқа дейін тартуымыз керек", – дейді Жоғарғы соттың судьясы Маргарита Одинцова.
