"Пренаталдық бақылаумен қамту күшейтіліп, бұл көрсеткіш 99,2%-ға жетті. Жүкті әйелдерді 12 аптаға дейін ерте қамту 5%-ға өсті. Пренаталдық ультрадыбыстық скринингпен қамту 5%-ға, биохимиялық скринингпен қамту 10%-ға артты, сондай-ақ балаларды 1 жасқа дейін проактивті бақылаумен және скринингпен қамту 81%-ға дейін ұлғайды. Жүкті әйелдер мен жаңа туған нәрестелерге білікті медициналық көмек көрсету үшін 18 ұрықты сақтау орталығы ұйымдастырылды, пренаталдық диагностика бойынша 150-ден астам ультрадыбыстық маман оқытылды", - деп хабарлады ведомство.
Былтыр "Ұлттық шұғыл медицинаны үйлестіру орталығының" ресурстарын пайдалана отырып, ғылыми және республикалық жетекші мамандарымен бірлесіп, жүктілік және босану ағымы асқынған 910 әйелге 1391 медициналық қызмет көрсетілді.
"Санитариялық авиациямен 200 ұшу орындалып, 21 әйелге ота жасалды. Ал, ауыр жағдайдағы 180 пациент облыстық және республикалық клиникаларға жеткізілді. Қабылданған шаралардың нәтижесінде ауыр жағдайдағы 1237 әйелдер (96%) құтқарылды", - делінген министрлік таратқан ақпаратта.
