Ғылым және жоғары білім министрлігі Қазақстан азаматтығын алғысы келетін және қалпына келтіргісі келетін шетелдіктерге қойылатын мемлекеттік тілді білу талабын жеңілдететін бұйрық жобасын "Ашық НҚА" порталына шығарды, деп жазады inbusiness.kz сайты.
– Жобаны қабылдау Қазақстан Республикасының азаматтығын алуға үміткерлерді тестілеудің әрбір пәні бойынша сұрақтар санының максималды тең қатынасын қамтамасыз етуге және шекті деңгейді 10%-ке төмендетуге мүмкіндік береді, – деп жазылған құжаттың түсіндірмесінде.
Құжаттың ресми атауы – "Қазақстан Республикасының азаматтығына қабылдау немесе азаматтығын қалпына келтіру кезінде мемлекеттік тілді қарапайым деңгейде, Қазақстан Республикасы Конституциясының негіздерін, сондай-ақ Қазақстан тарихын білу көлемін бекіту туралы" бұйрық. Осы бұйрықтың жаңа редакциямен жазу ұсынылып отыр.
– Қазақстан Республикасының азаматтығына қабылдау немесе азаматтығын қалпына келтіру кезінде мемлекеттік тілді қарапайым деңгейде 15 (он бес) балдан кем емес, Қазақстан Республикасы Конституциясының негіздерін 20 (жиырма) балдан кем емес, сондай-ақ Қазақстан тарихын 15 (он бес) балдан кем емес білу көлемі бекітілсін, – делінген жаңа редакция жобасында.
Айта кетейік қазіргі уақытта қазақ тілін бастауыш деңгейде білу кемінде 36 балл, ал Конституция негіздерін білу 9 баллдан кем емес.
Қазақстан тарихын білу деңгейіне қойылатын талаптар өзгеріссіз қалады.
Жоба 25 шілдеге дейін қоғамдық талқылау үшін "Ашық НҚА" порталында орналастырылған.
