Елімізде бірқатар пойыз кестесіне өзгерістер енгізіледі. 2018-2019 жылдарға арналған жаңа кесте 9 желтоқсаннан бастап жұмыс істейді.
"Жолаушылар тасымалы" мамандары таратқан ақпарат бойынша, "Ресей Темір Жолдары" компаниясына тиесілі пойызын "Қарағанды-Томск-2" бағытында күнара жүруді жолға қою жоспарланған. Ал, Бейнеу - Атырау - Қиғаш арқылы "Ташкент - Мәскеу" қатынасындағы пойызы аптасына бір рет жүретін болады.
Сонымен қатар, жол жүру уақытын 4 сағатқа қысқарту және жылдамдықты арттыру есебінен "Алматы-2 - Маңғыстау" бағытында қатынайтын №377/378 пойызын жеделдету туралы шешім қабылданды.
Сондай-ақ, 2019 жылдың 2 қаңтарынан "Алматы-2 - Орал" бағытындағы №49/50 пойыздың жүру жолы өзгереді. Енді пойыз Астана - Тобыл станциясы арқылы жүреді.
Бұдан бөлек, Астана - Алматы, Алматы – Семей, Алматы - Шымкент және Алматы - Түркістан арасында қатынайтын пойыздардың жиілігі күнара болып ауыстырылды.
Толық ақпаратты "105" анықтама нөмірінен біле аласыздар.
