Ресми дерек бойынша, соңғы 10 жылда бұл мемлекет Қазақстанға 8,8 млрд доллардай қаражат салған, деп жазады Finprom.kz.
Ұлыбритания – Қазақстанның негізгі стратегиялық серіктестерінің бірі. Осы жылдың алғашқы алты айында британиялық инвестиция көлемі 17,2 %-ға өсіп, 336,5 млн доллар болды.
Өткен жылы жалпы инвестиция түсімі 593,1 млн доллар болған еді. Бұл көрсеткіш 2017 жылмен салыстырғанда 11,1 %-ға артық.
2018 жылы Қазақстан мен Ұлыбритания арасындағы алыс-беріс 1,3 млрд долларды құрады. Оның 63% немесе 793,9 млн доллары қазақстандық тауарлар мен қызметтердің экспорты, ал қалған 37% немесе 466,8 млн доллары британиялық импорттың үлесіне тиесілі.
ҚР еңбек және халықты әлеуметтік қорғау министрлігінің мәліметі бойынша, қазір елімізде 1400-ге жуық британиялық еңбек мигранты жұмыс істеп жатыр.
Ұлыбритания – Қазақстандағы ірі үш инвестордың бірі. Маусым айындағы дерекке сүйенсек, бұл мемлекеттен құйылған жинақталған инвестиция 22,8 млрд долларға жеткен. Бұл былтырғы жылмен салыстырғанда 6,3%-ға кем. Британиялық инвесторлар үшін Қазақстандағы ең тартымды салалар – кәсіби, ғылыми және техникалық қызметтер. Бұларға қаражаттың 34,3%, яғни 7,8 млрд доллар бөлінген. Ал мемлекеттік басқару, қорғаныс және міндетті әлеуметтік қамсыздандыру салаларына 5,3 млрд доллар көлемінде қаражат құйылған. Ал 2,6 млрд доллар мөлшеріндегі инвестиция көлік, азық-түлік салаларына тиесілі.
Табиғат Нұрболат
