Ресми ақпараттарға сүйенсек, елімізде ең төменгі жалақыны өнер, ойын-сауық және демалыс саласында еңбек ететін мамандар алады, деп хабарлайды inbusiness.kz тілшісі finprom.kz-ке сілтеме жасап.
Саладағы орташа айлық атаулы жалақы 2021 жылдың үшінші тоқсанында небәрі 162,6 мың теңгені құрады. Бұл Қазақстандағы орташа көрсеткіштен төмен.
Биылғы жылдың екінші тоқсанымен салыстырғанда өнер, ойын-сауық және демалыс саласындағы қызметкерлер жалақысының сатып алу қабілеті 1,7%-ға артты. Ал жалпы Қазақстан бойынша көрсеткіші 5,1%-ға төмендеді.
Биылғы жылдың үшінші тоқсанының қорытындысы бойынша өнер, ойын-сауық және демалыс саласында еңбек ететін қызметкерлердің саны 69,9 мың адамды құрады. Бұл өткен тоқсанмен салыстырғанда 3,2%-ға, өткен жылмен салыстырғанда 0,3%-ға аз.
2021 жылдың қаңтар-қыркүйек айларында шығармашылық, өнер және ойын-сауық саласындағы қызметтердің көлемі 33,2 млрд теңгені құрады. Бұл 2020 жылдың сәйкес кезеңімен салыстырғанда құндық мәнде 9,7%-ға артық. Бірақ "коронавирусқа дейінгі" көрсеткіштен 16,4%-ға аз.
