Қазақстанда жарты жылда қолма-қол ақшасыз төлемдердің көлемі 100,7 трлн теңгеге жетіп, бір жылда 20%-ға артқан, деп жазады inbusiness.kz сайты.
Ұлттық Банктің мәліметінше, барлық транзакцияның 98%-ы қолма қол ақшасыз форматта жасалған, ал QR-код арқылы төлемдер POS-терминалдарды басып озды.
Ұлттық Банктің төлем жүйелері арқылы жалпы 746 трлн теңгеге 54,6 млн операция орындалды. Бұл өткен жылмен салыстырғанда көлемі бойынша 9,2%-ға, саны жағынан 34%-ға көп.
Бірінші жартыжылдықта халық төлем карточкалары мен банктердің мобильді қосымшаларын белсенді қолданған.
"Халықаралық ақша аударымдары қысқарды: шетелге жіберілген қаражат көлемі 16%-ға азайып, 321 млрд теңгені құрады. Қазақстанға түскен аударымдар да 105 млрд теңгеге дейін төмендеді.
Төлем ұйымдарының айналымы өсіп, 4,6 трлн теңгеге жетті. Ең көп сұранысқа ие қызмет – онлайн төлемдерді өңдеу. Дегенмен Ұлттық Банк заң бұзған бірнеше ұйымды тіркеуден шығарып, айыппұлдар салды", – делінген хабарламада.
Қаржы нарығының қауіпсіздігі үшін қашықтан сәйкестендіру сервисі мен Антифрод-орталық белсенді жұмыс істеді.
Алты айда 23,5 млн биометриялық тексеру жүргізіліп, 2,3 млрд теңгенің алаяқтық транзакциясы бұғатталды.
