Елімізде мотор майларын таңбалау бойынша пилоттық жоба іске қосылды

247

Жобаны іске асыру мерзімі – 1 жыл.  

Елімізде мотор майларын таңбалау бойынша пилоттық жоба іске қосылды Фото: gov.kz

Энергетика министрлігі, "Атамекен" ҰКП және "Қазақтелеком" АҚ-мен (Бірыңғай оператор)  бірлесіп мотор майларын сәйкестендіру құралдарымен таңбалау және қадағалау бойынша пилоттық жобаны іске асырып жатыр, деп жазады inbusiness.kz.

Мотор майларын цифрлық таңбалау бойынша пилоттық жобаны іске қосу 2024 жылғы 1 ақпаннан бастап Энергетика министрінің бұйырығымен  жүзеге асырылды.

Пилоттық жобаға нарықтың барлық қатысушыларын – өндірушілер мен импорттаушылардан бастап көтерме-бөлшек сауда сегментіндегі компанияларды қосу жоспарланып отыр.

Пилоттық жобаның негізгі мақсаттары:

  • мотор майлары нарығында адал бәсекелестікті қамтамасыз ету;
  • тұтынушылар үшін мотор майларың шығу тегі туралы ақпараттың айқындылығы мен сенімділігін жақсарту;
  • өнім айналымын бақылау және контрафактілік өніммен күресу тиімділігін арттыру;
  • отандық өндірісті дамытуға және мотор майлары саласының бәсекеге қабілеттілігін арттыруға жәрдемдесу;
  • ЕАЭО-дағы трансшекаралық сауда шеңберіндегі кедергілерді жою.

Мотор майларын таңбалау және қадағалау жөніндегі пилоттық жоба өндірушіден соңғы тұтынушыға дейінгі барлық жолда өнімді  сәйкестендіру және қадағалау үшін пайдаланылатын арнайы таңбалау кодтарын енгізуді көздейді. Бұл тәсіл тиімді жүйелік бақылауды орнатуға және мотор майларының сапасы мен қауіпсіздігінің жоғары деңгейін қамтамасыз етуге мүмкіндік береді.

2023 жылғы желтоқсанда Бірыңғай оператор Павлодар, Семей және Шымкенттегі үш ірі отандық май өндірушілердің өндірістік алаңдарын зерттеу бойынша іс-шаралар өткізді. Пилоттық жобаға қатысушылардың логистикалық, сауда процестері және пайдаланылатын ақпараттық жүйелері зерделенді.

"Өндірушілерді, импорттаушыларды, дистрибьютерлерді, логистикалық компанияларды, көтерме және бөлшек сатушыларды пилоттық жобаға қатысуға шақырамыз. Жобаға қатысу сіздің тұтынушылар алдындағы жауапкершілігіңізді көрсетуге және нарықтағы беделіңізді нағайтуға мүмкіндік береді. Сонымен қатар, сіз контрафактілік өніммен күресуге және өз бизнесіңіздің мүдделерін қорғауға үлес қоса аласыз", - делінген министрлік таратқан хабарламада.

Тауарларды цифрлық таңбалау және қадағалау жүйесі туралы толық ақпарат алу үшін 8 800 080 6565 нөмірі бойынша Бірыңғай оператордың тәулік бойы байланыс орталығы жұмыс істейді.

Telegram
БІЗДІҢ ТЕЛЕГРАМ АРНАМЫЗҒА ҚОСЫЛЫҢЫЗ Ең соңғы жаңалықтар осында
Жазылу
Telegram арнамызға жазылыңыз! Жаңалықтар туралы бірінші біліңіз
Жазылу