Бүгінде елімізде оқушылардың 53%-ы қашықтан оқып жатыр. Бұл туралы білім және ғылым вице-министрі Шолпан Каринова айтты, деп хабарлайды inbusiness.kz тілшісі.
Оның айтуынша, Қазақстанның бас санитар дәрігерінің қаулысына сәйкес, 1 наурыздан бастап 1-5 сыныптардың, халықаралық мектептерде 1-7 сыныптардың оқушылары аралас оқытуға көшірілген.
"Қазіргі таңда оқушылардың 47%-ы штаттық режимде, 53%-ы әлі қашықтан білім алып жатыр. Өңірдегі санитарлық-эпидемиологиялық жағдайға байланысты штаттық немесе қашықтан оқытатын пәндерді әр білім мекемесі дербес анықтауға құқы бар", - деді вице-министр орталық коммуникациялар қызметінде өткен баспасөз мәслихатында.
Сондай-ақ Шолпан Каринова оқушылар қандай жағдайда қашықтан оқитынын түсіндірді.
"Оқушылар ауырған жағдайда немесе науқастармен байланыста болғанда ата-аналардың өтініші негізінде олардың қашықтан оқуға мүмкіндігі бар", - деді ол.
Вице-министр білім беру ұйымдарында санитарлық талаптар қатаң сақталуы керегін, оған білім басқармаларының басшылары мен мектеп директорлары жауап беретінін атап өтті.
Дәурен Ерболат
