Биылғы жылдың басындағы жағдай бойынша елімізде адам өмірін сақтандыратын 9 компания тіркеліп, қызметін жалғастыруда. Аталған нарық жылдан-жылға ұлғайып келеді, деп хабарлады inbusiness.kz порталы ranking.kz-ке сілтеме жасап.
Соңғы 5 жылда сектордың активтері 3,7 есе, ал жалпы сақтандыру саласындағы компаниялардың активтері 45,4%-ға өсті.
2020 жылы адам өмірін сақтанрыду қызметінен түскен сыйақы 228,9 млрд теңгені құрады. Бұл бір жыл бұрынғы көрсеткіштен 16% жоғары (197,3 млрд теңге). Бұл көрсеткіш рекордтық болып саналады. Соңғы 3 жылда өмірді сақтандыру саласынан түскен сыйақы көлемі орта есеппен жылына 39,5%-ға артуда.
Бұл жинақтық сақтандыру нарығының дамуына байланысты қалыптасып келе жатқан үдеріс. Оның басты артықшылығы – жинақтық сақтандыру ұзақ мерзімді инвестициялауға және жинақтарыңызға кепілдік береді. Банктер қарапайым депозиттер бойынша 10 жылға келісім шарт жасаспайды. Ал сақтандыру шарттары 5 жылдан 20 жылға дейінгі кезеңді қамтиды.
Құралай Құдайберген
