Енді бірқатар сұранысқа ие мамандықтар бойынша резидентура ересектер мен балалар бейіндеріне бөлінеді, деп хабарлайды inbusiness.kz сайты.
Бұл шешім арнайы бейінді балалар мамандарының тапшылығын азайту қажеттілігіне байланысты қолға алынды. Бір шетінен балаларға медициналық көмектің сапасын арттыру – басты мақсат.
Инновация заманауи білім мен клиникалық практикаға сүйене отырып, балалардағы ауруларды диагностикалауға, емдеуге және профилактикаға неғұрлым кешенді және нақты тәсілді қамтамасыз етеді.
Бөлінудің негізгі дәлелі – аурудың анатомиясындағы, физиологиясындағы, клиникалық көрінісіндегі, сондай-ақ ересектер мен балаларды диагностикалау мен емдеу әдістеріндегі айырмашылықтар. Жаңартылған даярлық жүйесі шеңберінде резидент дәрігерлер 27 жаңа балалар бағыты бойынша білім ала алады.
Олардың ішінде балалар кардиологиясы, аллергология және иммунология, гастроэнтерология, балалар жақ-бет хирургиясы, жасөспірімдер дерматовенерологиясы, балалар пластикалық хирургиясы, андрология және урология және т.б.
Қорғаныс министрлігінің ұсынысы бойынша, әскери дәрігерлерге арналған бағыттар тізіміне "Әскери терапия" және "Әскери хирургия" сияқты мамандықтар қосылды. Бұл әскерде қызмет ету үшін білікті медициналық кадрларды даярлауды қамтамасыз етеді.
