2025 жылдың қорытындысында Қазақстандағы туберкулездің эпидемиологиялық көрсеткіштері жақсарып келеді, деп жазады inbusiness.kz сайты.
Ведомство дерегіне сай, туберкулезбен сырқаттанушылық 9,9%-ға төмендесе, таралу көрсеткіші 12,8%-ға азайған.
– Емдеу тиімділігі де артты: дәріге сезімтал туберкулезден жазылу көрсеткіші 90,5%-ды кұрады, дәріге төзімді туберкулезден жазылу көрсеткіші 85,3%-ға дейін жоғарылады, бұл көрсеткіштер Дүниежүзілік денсаулық сақтау ұйымының (ДДҰ) стандарттарынан жоғары. Белсенді туберкулезбен ауыратын науқастар саны 15%-ке азайды. Қазақстан Республикасында туберкулездің алдын алу, диагностикалау және емдеу тегін медициналық көмектің кепілдендірілген көлеміне кіреді, – делінген ресми хабарламада.
Елімізде МСАК ұйымдары деңгейінде туберкулезді ерте диагностикалаудың заманауи әдістері енгізілген: GeneXpert аппараты арқылы жүргізілетін (туберкулезге ПТР) зерттеу нәтижелері 2 сағат аралығында дайын болады.
ДДҰ ұсынымдарына сәйкес, дәріге төзімді туберкулез түрлерін емдеуде тиімділігі жоғары, инъекциясыз қысқа мерзімді 12 айдан 6 айға дейін емдеу режимдері қолданылады, бұл емдеу режимдері қабылдауға ыңғайлы таблетка түрінде ұсынылады.
– Туберкулез инфекциясын профилактикалық емдеу үшін 1 айдан 3 айға дейінгі жаңа қысқа мерзімді режимдері қолданылады. Бұл байланыста болған адамдар мен қауіпті топтарындағы тұлғалар арасында белсенді туберкулездің дамуының алдын алуға мүмкіндік береді. Жыл сайын науқастардың 95%-дан астамы әлеуметтік қолдаумен қамтылады. Амбулаториялық деңгейде науқастардың 40%-ы емдеуді бейнебақылау режимінде қабылдайды, – деп жазды министрліктің әлеуметтік желідегі парақшасы.
Денсаулық сақтау министрлігі пациенттерді әлеуметтік қолдауға және елдегі эпидемиологиялық жағдайды одан әрі жақсарту жұмыстарын жалғастыра түспек.
