Биылғы қаңтар-қыркүйек айларында Қазақстанда 3,8 млрд жұмыртқа алынды. Бұл былтырғыға қарағанда 1,9%-ға аз, деп жазады inbusiness.kz energyprom.kz порталына сілтеме жасап.
Республика бойынша ең көп жұмыртқа Ақмола облысында өндірілді: 548,9 млн дана. Үздік үштік қатарында Солтүстік Қазақстан (543,1 млн жұмыртқа) және Қарағанды (514,9 млн жұмыртқа) облыстары бар.
Қаңтар-тамыз айларының қорытындысы бойынша отандық компаниялар ішкі сұранысты 93,9%-ға қамтамасыз еткен.
Импорт үлесіне 6,1% тиесілі. Жыл басынан 217,5 млн дана жұмыртқа әкелініп, бұл өткен жылдың қаңтар-тамыз айларымен салыстырғанда 66,3%-ға көп.
132,8 миллион дана жұмыртқа экспортқа жіберілді. Бұл былтырғыға қарағанда 28%-ға аз.
Ішкі нарықта 3,4 млрд дана жұмыртқа сатылған.
Биылғы қыркүйек айының қорытындысы бойынша бірінші санаттағы жұмыртқа бір айда 2,9%-ға, бір жылда 13,6%-ға қымбаттады.
Бір айда бағаның ең жоғары өсуі ШҚО-да тіркелді: +7,8%. Антилидерлер қатарында Ұлытау (+6,4%) және Абай (+6%) облыстары бар. Бағаның ең аз өсімі Ақтөбе және Түркістан облыстарында байқалды. Алматы облысында баға 3%-ға төмендеген.
Жылдық динамикада ең жоғары жылдық өсім Шығыс Қазақстан облысында: +31%. Одан кейінгі орындарда Ұлытау (+30,3%) және Солтүстік Қазақстан (+29,1%) облыстары орналасты.
