Бүгін Мемлекет басшысы Қасым-Жомарт Тоқаевтың төрағалығымен Үкіметтің кеңейтілген отырысы өтіп жатыр. Жиын барысында Премьер-Министр Әлихан Смайылов Үкіметтің биылғы 11 айдағы жұмысы туралы баяндама жасады, деп жазады inbusiness.kz тілшісі.
Әлихан Смайловтың айтуынша, 2023 жылдың 1 тоқсанында еліміздің барлық жылу электр станциясы және электр желілерінің аудиті аяқталады.
"Бұған қоса, жылу желілерінің аудиті өткізіледі",- деді Премьер-министр.
Оның дерегінше елімізде ЖЭС жұмысын тиімді ету мақсатында жаңа бағдарлама әзірленіп жатыр.
"Әзірленіп жатқан "Тарифті инвестицияларға айырбастау" бағдарламасы электр, жылу және құбыр желілерінің тозуын 20%-тік тармаққа төмендетуге мүмкіндік береді. Бұл үшін 3,8 трлн. теңгеге дейін инвестицияларды тартып, 134 мың километрден астам инженерлік желілерге жөндеу жүргізу қажет. Тиісті ережелер осы аптада бекітіледі", - деді Әлихан Смайылов.
Үкімет басшысының айтуынша, сонымен қатар, Ұлттық электр желісін жаңғырту, оның ішінде Батыс Қазақстанның электр желілерін Бірыңғай электр энергетикалық жүйеге қосу бойынша жұмыстар жүргізілуде.
