Бүгінгі таңда FIDIC келісімшарттары бойынша Қазақстанда бірқатар автожол жобалары іске асырылып жатыр. Атап өтер болсақ, "Балқаш - Бурылбайтал - Күрті - Қапшағай", "Қандыағаш - Мақат" және "Атырау –Астрахань - РФ шекарасы" жобалары.
"FIDIC-те тараптардың келісім-шарттар бойынша өзара қарым-қатынастары егжей-тегжейлі көрсетілген. Талап пайда болған жағдайда қандай шара қолдану керектігі жіті айтылған. Тәуекелдер мен сыйақыларды әділ үлестіру бүге-шүгесіне дейін жазылған, әрбір тармақ ескерілген", – деп айтты "Балқаш-Бурылбайтал" автожолы учаскесі жобасының жетекшісі Пак Чун Сун.
FIDIC немесе халықаралық инженер-консультанттар Федерациясы 1913 жылы құрылған. Бұл орган әлемнің 100-ден астам елінде бар. FIDIC-те бір миллионнан астам инженерлік маман, 40 мыңға жуық фирма жұмыс істейді.
"Кореяда инженер-консультанттар қауымдастығы FIDIC бойынша арнайы білім беру бағдарламаларын дайындайды. Әдетте инженерлік компаниялар жұмыс берушілер мамандарды оқытуға ақы төлейді. Бағдарлама үш айға созылады, содан кейін сертификаттар мен дипломдар беріледі. Бірақ FIDIC-ке өзгерістер мен толықтырулар енгізілгендіктен, сіз үнемі оқып, біліміңізді жаңартып, жетілдіріп отыруыңыз керек", – деп Пак мырза халықаралық тәжірибемен бөлісті.
Айта кетейік, Үкіметтің кеңейтілген отырысында Мемлекет басшысы Қасым-Жомарт Тоқаев Қазақстанға автожол саласына FIDIC халықаралық қағидаттарын енгізу қажеттігін атап өткен болатын. Бұл жол саласын тиімді басқаруға, бюджет қаражатын ұтымды пайдалануға және жемқорлық қаупін азайтуға мүмкіндік береді деді Президент.
