Қазақстанның бірнеше өңірінде аптап ыстық пен дауылды жел күтіледі, деп хабарлайды inbusiness.kz сайты.
30 шілдеде Қазақстанның бірқатар өңірінде аптап ыстық, қатты жел, найзағай және шаңды дауыл болады. Кей жерлерде бұршақ жауып, дауыл соғуы мүмкін. Бірқатар облыста төтенше өрт қаупі сақталады.
Қызылорда облысында күндіз 40-44 градусқа дейін ыстық болады. Облыстың орталығы мен шығысында шаңды дауыл соғып, желдің жылдамдығы 15-20 м/с-қа жетеді. Өңірде төтенше өрт қаупі сақталады.
Түркістан облысында күндіз 40-42 градус ыстық күтіледі. Батысы мен солтүстігінде шаңды дауыл болады. Желдің жылдамдығы 15-20 м/с, тау асуларында екпіні 23-28 м/с-қа дейін жетеді. Облыс бойынша төтенше өрт қаупі сақталады.
Шымкентте де күндіз ауа температурасы 40 градусқа дейін көтеріледі. Солтүстік-шығыстан соққан желдің екпіні 15-20 м/с болады. Қалада жоғары өрт қаупі сақталады.
Маңғыстау облысының солтүстік-шығысы мен оңтүстігінде 38-42 градус ыстық болады. Батысы, солтүстігі және орталығында жел күшейіп, найзағай ойнауы мүмкін. Өңірдің солтүстік-шығысы мен орталығында төтенше өрт қаупі сақталады.
Ақмола, Солтүстік Қазақстан, Қостанай, Ақтөбе, Ұлытау, Қарағанды, Павлодар, Алматы, Жетісу облыстарында күндіз 35-38 градусқа дейін ыстық күтіледі.
Шығыс Қазақстан, Абай, Солтүстік Қазақстан, Қостанай, Ақтөбе және Батыс Қазақстан облыстарының жекелеген аудандарында жаңбыр, найзағай, бұршақ және дауыл болады. Кей өңірлерде желдің екпіні 20-23 м/с-қа дейін күшейеді.
Атырау облысында күндіз 35 градус ыстық күтіледі, желдің екпіні 15-18 м/с болады. Өңір бойынша төтенше өрт қаупі сақталады.
Жамбыл облысында солтүстік-шығыстан соққан желдің жылдамдығы 15-20 м/с, екпіні 23 м/с-қа дейін жетеді. Облыста төтенше өрт қаупі сақталады.
Астанада 30 шілдеде күндіз 35 градус қатты ыстық болады. Алматыда төтенше өрт қаупі сақталады.
Қазгидрометтің мәліметінше, ауа райының қолайсыздығына байланысты тұрғындарға сақтық шараларын сақтау ұсынылады.
