"ҚазАвтоЖол" ауа райының қолайсыздығына байланысты кейбір республикалық маңызы бар жолдардың учаскелерінде көлік қозғалысына шектеу енгізілгенін мәлімдеді, деп хабарлайды Inbusiness.kz сайты.
"Қар жауып, боран соғып, айналаның көріну деңгейінің төмендеуіне, сондай-ақ жолды тазарту бойынша жұмыстарды жүргізуге байланысты еліміздің екі облысында республикалық маңызы бар тас жолдардың 3 учаскесінде көлік қозғалысына шектеу енгізілді", - делінген "ҚазАвтоЖол" ҰК" АҚ баспасөз қызметі таратқан мәліметте.
2023 жылы 20 желтоқсанда мына жол учаскелері жабылды:
Жамбыл облысында "Алматы-Ташкент-Термез" тас жолының 159-238 шақырым аралығы, Кенен станциясынан Қайнар ауылына (Жаңа Қордай асуы) дейін -79 км;
Жетісу облысында "Үшарал-Достық" тас жолының 84-184 шақырым аралығы, Көктұма станциясынан Достық станциясына дейін – 100 км; "Сарыөзек-Көктал" тас жолының 45-68 шақырым аралығы, (Алтын Емел асуы).
Шектеу барлық көлік түрлеріне қолданылады.
