Облыстық көркемсурет музейінің басшысы Айгүл Нұрғамысова атап кеткендей, аталмыш іс-шараны өткізу жыл сайын дәстүрге айналған, деп хабарлайды pavlodarnews.kz.
"Жыл сайын дәстүрлі түрде суретшілеріміз табиғат аясында өңіріміздің көрікті жерлерін кенеп бетіне түсіреді. Биыл күз мерзімін таңдадық. Қазақстанның інжу-маржаны – Баянауыл өлкесінде 20 суретші жұмыс істейді",– дейді Айгүл Нұрғамысова.
Облыстық көркемсурет музейі басшысының айтуынша, Баянауылға жол жүретін қылқалам шеберлерінің 15-і павлодарлық болса, қалған бесеуі – алматылық.
Қазақстан Суретшілер одағы облыстық филиалының төрағасы Өсербай Шорановтың сөзіне қарағанда, әрбір шебер пленэрден үш сурет қалдыруы шарт. Найзатас, Жұмбақтас, Сабындыкөл, Жасыбай көлдерінің көріністерін кенепке түсіру жоспарлануда.
