Орталық коммуникациялар қызметінде өткен брифингте еліміздің мемлекеттік бас санитар дәрігері Айжан Есмағамбетова өңірлерде COVID-19-дың таралу статистикасына тоқталды.
"Елімізде алдыңғы аптамен салыстырғанда сырқаттану көрсеткіші 1,4 есеге өскен. Сегіз аймақта, оның ішінде Ақмола, Қостанай, Түркістан, Жамбыл, Солтүстік Қазақстан, Қызылорда, Батыс Қазақстан, Павлодар облыстарында сырқаттану көрсеткіші 2 еседен, 6 есеге дейін артты. Ал бес өңірде: Алматы, Атырау, Шығыс Қазақстан, Маңғыстау облыстары мен Нұр-Сұлан қаласында сырқаттанғандар саны 20%-дан 50%-ға дейін өсті. Қалған Алматы, Шымкет қалалары мен Ақтөбе Қарағанды облыстарында індет жұқтырғандар санының күрт көбеюі байқалмады", – деген мемлекеттік бас санитар дәрігер індет жұқтырғандардың көбі науқастармен байланыста болғандар екенін атап өтті.
"Індет жұқтырғандардың 37%-ы байланыста болғандар, 38%-ы профилактикалық тексеру барысында, 25%-ы жіті респираторлық вирустық инфекцияға шалдыққан науқастардың арасында, 0,3%-ы сырттан келгендер арасында анықталды. Өткен тәулікте елімізде сырқаттанудың 499 жаңа жағдайы тіркелді. 816 симптомсыз вирус тасымалдаушы анықталды. Науқастар саны халықтың бір-бірімен жиі байланыста болуының нәтижесінде артуда. Оның ішінде отбасылық, еңбек және әлеуметтік байланыс бар", – деді Айжан Есмағамбетова.
Құралай Құдайберген
