Елімізде шетелдік туристердің жарна төлеу тәртібі енгізілмек, деп хабарлайды Atameken Business.
Мәдениет және спорт министрі Арыстанбек Мұхамедиұлының айтуынша, бюджеттік жүктемені төмендетіп, саланы ілгерілету үшін, өзге ел азаматтарынан бір түнге 2-4 доллар көлемінде ақы алынбақ. Қаражат Kazakh Tourism жанынан ашылған бюджеттен тыс шотқа түседі. Мұндай тәжірибе Грузия, Чехия, Біріккен Араб әмірлігі сияқты мемлекеттерде сәтті жүзеге асқан.
"Шара сондай-ақ, Kazakh Tourism маркетингтік жұмысының тиімділігін ынталандырады. Шетелдік туристер ағынының ұлғаюынан көбірек алымдар алатын болады. Бірінші кезеңдерде шарадан түскен қаржылық түсімдер кейіннен ұлғайып, жылына 1,5 млрд теңгені құрайды", – дейді министр.
Сондай-ақ, министр елдегі әуежайларға 2022 жылдан бастап Tax Free жүйесі енгізілетінін жеткізді. Осының арқасында көптеген дамыған ел сауда айналымын ғана емес, шопинг-туристердің ағынын да ұлғайтып отыр екен. Шара PremierTaxFree, GlobalBlue, InnovaTaxfree сияқты операторларды тарту арқылы Астана, Алматы, Шымкент сияқты ірі әуежайларда жүзеге асыру көзделген.
