Елордада 10 қабатты үйде қауіпті өрт: балалар құтқарылды

Оқиға Нұра ауданындағы Құлтегін көшесінде орналасқан 10 қабатты үйде тіркелді.

Фото: ТЖМ

Астанада көпқабатты тұрғын үйде болған өрт тұрғындарды әбігерге салды, деп жазады inbusiness.kz сайты.

ТЖМ мәліметінше, өрт электр қалқаны орналасқан шахтада тұтанған. Алғашқы бөлімшелер келген кезде подъезде қою түтін байқалған. Өрт сөндірушілер жедел түрде оқпандар беріп, жалынды оқшаулауға кірісті. Сумен үздіксіз қамту ұйымдастырылып, тұрғындарды эвакуациялау шаралары қолға алынды.

Құтқару жұмыстары барысында автосатының көмегімен 3 адам құтқарылды, оның екеуі — бала. Сонымен қатар баспалдақ арқылы арнайы құтқару қалпақшаларының көмегімен тағы 3 адам қауіпсіз жерге шығарылды, олардың бірі — бала.

Нақтыланған мәліметке сәйкес, өрт электр қалқаны шахтасы арқылы бірінші қабаттан оныншы қабатқа дейін таралған. Қазіргі уақытта өрт толық сөндірілді.

Зардап шеккендер туралы 112 қызметіне ақпарат түспеген. Оқиғаның нақты мән-жайы анықталып жатыр.