Кеше Нұр-Сұлтанда жөндеу жұмыстарын жүргізу кезінде "Астана Су Арнасының" 4 жұмысшысы кәріз құдығына құлап, уланып қаза тапты, деп хабарлайды ІІМ ТЖ комитетінің баспасөз қызметі.
Жұмысшылардың құдыққа құлағаны туралы хабар пультке 16:24-те түскен.
"Оқиға орнына келген уақытта кәріз шахтасына жөндеу жүргізу жұмыстары кезінде 4 жұмысшы тереңдігі 10-12 метрлік құдыққа құлап, биогаздан уланып қалғаны белгілі болды",– делінген хабарламада.
Қайғылы жағдай Футбол федерациясына қарасты аумақта орын алған. Дәл қазір тергеу-тексеру жүріп жатыр.
ТЖ комитетінің басшысы Владимир Беккердің айтуынша жұмысқа негізінен 6 адамнан тұратын бригада тартылған екен. Құдыққа құлаған бірін құтқаруға ұмтылған екіншісі де естен танып қалыпты. Соңынан үшінші, төртінші жұмысшы да көмектесем деп жүріп, көз жұмған. Ал сыртта қалған екі адам: көлік жүргізушісі мен сантехник жедел жәрдемге хабар беріпті.
Еңбек және халықты әлеуметтік қорғау министрлігі оқиғаның мән-жайын анықтау үшін арнайы комиссия құрды. Комиссияны елорданың бас мемлекеттік еңбек инспекторы басқарады.
