Ақпарат және қоғамдық даму министрі Дәурен Абаев Нұр-Сұлтан қаласында жұмысын қайта жандандыратын кәсіпорындар туралы мемлекеттік комиссия отырысының қорытындысын мәлімдеді.
"Нұр-Сұлтан қаласының әкімі 20 сәуірден бастап келесі секторлардағы кәсіпорындардың жұмысын жалғастыруды ұсынды. Бірінші, өндірістік және индустриялық кәсіпорындар. Екінші, құрылыс саласындағы кәсіпорындар. Үшінші, қыстан кейін жол жөндейтін, асфальт-бетон зауыттары. Төртінші, зейнетақы мен жәрдемақы беру үшін екінші деңгейдегі банктер қызмет етеді. Банктер сағат 16:00-ге дейін қысқа жұмыс кестесімен жұмыс істейді. Бесінші, жеке-қосалқы қызмет көрсетету секторының кейбір ұйымдары. Мысалы, химиялық тазалау және кір жуу ұйымдары, шиномонтаж, арнайы техникаларды жөндеу, көлік жуу станциялары. Алтыншы, қоғамдық тамақтану орындарынан тамақ жеткізу мүмкіндігін кешкі сағат 22:00-ге дейін ұзарту ұсынылады",– деп айтып өтті Дәурен Абаев.
Министрдің сөзінше, аталған кәсіпорындарда 100 мыңға жуық адам жұмысын жалғастырады. Бұл – Нұр-Сұлтан қаласындағы халықтың шамамен 20%-ы. Кәсіпорындарда санитарлық нормаларды сақтау бойынша арнайы хаттамалар дайындалалып, тұрақты түрде тексеріледі. Егер кәсіпорын ол талаптарды бұзса, қатаң шектеу шаралары қолданылады.
Нұржан Көшкін
