Елордада қоян-қолтық ұрыстан V халықаралық Елбасы Кубогі өтіп жатыр, оған 8 елден 450 спортшы қатысуда, деп хабарлайды Елорда Инфо.
Спорттық бәсеке 1 желтоқсан ҚР Тұңғыш Президенті күніне орай елордадағы "Жекпе-жек" сарайында өткізілуде. Оған әлемнің 8 елінен 60-тан астам команда қатысып жатыр. Атап айтқанда, Қазақстан, Ресей, Өзбекстан, Қырғызстан, Армения, Әзербайжан, Беларусь және Моңғолия елінің өкілдері бар.
"Бүгінде қоян-қолтық ұрысы спорты ұлттық деңгейде ғана емес халықаралық аренада да танымал. Жарысқа әлемнің 8 елінен 400-ден астам спортшы қатысуда. Олардың барлығы да халықаралық сертификатқа ие. Және олардың қатарында спорт шебері мен спорт шеберіне кандидаттар бар. Сайыстың әсерге толы әрі әділ өтетініне сенімдімін. Сондай-ақ, осындай шараны ұйымдастырған халықаралық қоян-қолтық ұрысы қауымдастығына алғысымды білдіремін", – деді ҚР Қорғаныс министрі Нұрлан Ермекбаев турнирдің ашылу салтанатында.
Турнирдің биылғы жүлде қоры 8 млн теңгені құрайды. Сол сияқты 1 орын иеленген жеңімпазға "Спорт шебері" біліктілігі беріледі.
Айтулы спорттық шараны ұйымдастырушы ҚР Қорғаныс министрлігі Орталық спорттық клуб болып табылады.
