Бас санитар дәрігердің қаулысы бойынша енді мейрамхана мен дәмханалар кешкі сағат 8-ге дейін ғана жұмыс істейді. Сондай-ақ нысанның орналасқан жеріне қарамастан іште 30-дан астам адам болмауы шарт. Бұдан бөлек сауда ойын-сауық орталықтары демалыстарда жабық болады. Бірақ ішінде орналасқан дәріханалар мен супермаркеттерге кіруге тыйым салынбайды. Ал жай күндері кешкі 10-ға дейін жұмыс істейді. Құжатта барлық ұйымдар мен кәсіпорындар қызметкерлерінің кемі 80 пайызын қашықтан жұмыс істеуге көшіру қажеттілігі көрсетілген. Қоғамдық көліктерге дүйсенбіден сенбіге дейін таңғы 6-дан түнгі 23.00-ге дейін жұмыс істеуге рұқсат. Жексенбі күні тыйым салынады. Сондай-ақ, 65 жастан асқан азаматтарға қала және қоғамдық орындарда жүріп-тұруына шектеу қойылады.
