Тәуелсіздіктің 30 жылдығы, ұлттық домбыра және Астана күніне орай қалада "Думанды керуен" концерті ұйымдастырылуда. Ол 6 шілдеде аяқталады.
Концерттің мақсаты – елорда тұрғындарына мерекелік көңіл-күй сыйлау. Коронавирусқа байланысты іс-шарада санитарлық-эпидемиологиялық талаптар қатаң сақталған.
"Онда өнер көрсететін барлық әнші COVID-19-ға қарсы вакцина алған. Олар 3 күн сайын коронавирустың бар-жоғына ПТР-тест тапсырады. Мерекелік концерт елорда әкімдігінің қолдауымен ұйымдастырылған", - дейді ұйымдастырушылар.
Пандемия кезінде адамдардың бір орынға көп жиналмауы үшін жылжымалы сахна таңдалған. Концертке қатысатын әртістер, өнер ұжымына жеке автобус қарастырылған.
"Жылжымалы концерт кезінде өнерпаздар Нұр-Сұлтандағы 4 аудан: Есіл, Сарыарқа, Алматы және Байқоңырдағы тұрғын үй алаптарын аралайды. Ол үшін 4 сағаттық арнайы концерттік бағдарлама дайындалған. Концерттік бағдарламада қазақ халқының музыкалық мұрасы насихатталып, ұлттық саз аспаптарымен ән-күй орындалады. Сонымен бірге эстрада жанрында әндер шырқалады", - деп жазылған хабарламада.
4-5 шілдеде өнерпаздар Алматы ауданындағы "Күйгенжар", "Мичурино", "Интернациональный", "Теміржол", "Өндірістік", "Оңтүстік-Шығыс" тұрғын алаптарын өнер көрсетеді, ал 6 шілдеде Байқоңыр ауданындағы "Қазгородок", "Кирпичный", "Чугунка" тұрғын алаптары мен елорда іргесіндегі елдімекендерді аралайды.
Нұр-Сұлтанда карантин талаптары қатаң болғандықтан жылжымалы концерт еш жерге тоқтай алмайды.
