Қалалық ТЖД баспасөз қызметінің мәліметінше, 11 мамырда сағат 10.21-де Ұлы Дала көшесі 27/1 тұрғын үй кешенінде 9-қабатта бала тұрғаны туралы хабарлама түскен.
"Оқиға орнына қалалық ТЖД жеке құрамының 7 қызметкері мен 2 техникасы жіберілді. Олар ер адам 8-қабаттағы балконның карнизіне ілулі тұрған баланы құтқарғанын анықтаған. 2019 жылы туған қыз бала ата-анасымен бірге үйде болған, алайда оның жанында ешкім болмағандықтан ол терезеге шығып кеткен. 1985 жылы туған ер адам Сәбит Шонтақбаев 7-қабатта тұрып, өзінің өміріне қауіп төнгеніне қарамастан қызды өлімнен құтқарды", - деп жазылған хабарламада.
37 жастағы ер адам батылдығы, батырлығы мен ерлігі үшін марапатқа ұсынылады.
Нұр-Сұлтан қаласы ТЖД ата-аналарды сақ болуға, баланы қараусыз қалдырмауға шақырды.
