Цифрлық даму министрлігі телекоммуникациялар комитетінің төрағасы Дамир Сейсембеков елордадағы интернет әлсіз ұстайтын орындарға қатысты пікір білдірді, деп хабарлайды inbusiness.kz сайты.
"Астана туралы айтатын болсақ, онда былтыр қалада осындай 32 нүкте анықталды. Бұл елорда бойынша мобильді интернет нашар немесе мүлдем істемейтін орындар. Бүгінде осындай 10 орын жойылып, антенналық-мачталық қондырғылар орнатылды. Бұл бағыттағы жұмыс жалғасып жатыр", - деді Дамир Сейсембеков Үкімет отырысынан кейінгі брифингте.
Ведомство 5G технологияларын енгізу бойынша жұмыстарды қолға алған.
Келесі бір бастама – мобильді интернет кешкі уақыттағы жүктемеге байланысты дұрыс істемейтін орындар.
"Қазір қалада 5G технологиясы бар 250-ден астам базалық станция орнатылды. Мемлекет басшысы осы жылдың аяғына дейін 5G енгізу бойынша жұмысты аяқтауды тапсырды. Біз бұл мәселемен білек сыбана айналысып жатырмыз", - деді Телекоммуникациялар комитетінің төрағасы.
Айтуынша, Цифрлық даму министрлігі "ақ нүктелерді" анықтау бойынша жұмыстарды тұрақты жүргізетін болады.
"Былтыр анықталған орындар жыл соңына дейін жойылуы тиіс. Біз жаңа базалық станцияларды орнатамыз, олардың санын көбейтеміз. Аудандық әкімдіктермен қол қойылған жол картасына сәйкес, жыл соңына дейін осындай 32 орынды жоюды жоспарлап отырмыз", - деді спикер.
Айта кету керек, осыған дейін Қазақстанның ескі пойыздарына интернет орнатылмайтынын жазғанбыз.
