Астана күніне орай Нұр-Сұлтан қаласындағы Сәтбаев және Қажымұқан көшелерінің қиылысында белгілі ғалымның ескерткіші орнатылады, деп хабарлайды inbusiness.kz тілшісі.
Павлодар облыстық мәдениет, тілдерді дамыту және архив ісі басқармасы басшысының міндетін атқарушы Сәуле Османованың сөзінше, ескерткішті "Қазақстан" спорт кешеніне кіреберістегі аллеяға қояды.
"Геолог-ғалым, жерлесіміз Қаныш Сәтбаевтың ескерткішін скульптор, ҚР Суретшілер одағының мүшесі Асқар Нартов қоладан жасады. Постамент пен подиумы мәрмәрдан дайындалды. Ескерткіштің салмағы – 4,9 тонна. Бұл павлодарлықтардың бас қаланың туған күніне жасаған сыйлығы болмақ", - деді Сәуле Османова.
Айта кетелік, Ғылым Академиясының алғашқы Президенті Қаныш Сәтбаевтың ескерткішін дайындау үшін 2019 жылы Павлодар облысының бюджетінен 75 млн теңге бөлінген болатын. Кейін эскиздер конкурсы ұйымдастырылды. Аймақтың зиялы қауымы мен ардагерлері үздік жұмыстарды іріктеп алып, республикалық комиссияның қарауына ұсынды. Сол комиссияның шешімімен Асқар Нартовтың жұмысы үздік деп танылды.
Ескеркішті қою үшін Елордадағы аллеядан 100 шаршы метр аумақтағы жер ресімделді. Оның маңын абаттандыру жұмыстарымен де павлодарлықтар айналысады.
Ажар Дәулетова
