"Республиканың бас мемлекеттік санитарлық дәрігерінің қаулысына сәйкес, осы жылдың 15 тамызынан бастап 1 қыркүйегіне дейін жұмыс берушілер жұмысшыларын коронавирусқа қарсы вакцинаның І компонентімен иммундауы керек. Бұл ретте тұрақты медициналық қарсы көрсетімі бар адамдарға бұл талап қойылмайтынын атап өткім келеді. Тағы еске саламыз: бүгінгі күні коронавирустан қорғанудың бірден бір амалы – вакциналау. Тек уақтылы алынған екпе сырқаттан аман болуға кепілдік береді", - деді Нұр-Сұлтан қаласының бас мемлекеттік санитарлық дәрігері Сархат Бейсенова Нұр-Сұлтан қаласы әкімдігінің фейсбук парақшасы арқылы өткен баспасөз мәслихатында.
Жалпы Нұр-Сұлтан қазіргі таңда 5-6 мың адам коронавирусқа қарсы вакцина алып жатқан көрінеді. Осы жылдың 4 тамызындағы жағдай бойынша елде І компонентпен 348 113 адам егілген. ІІ компонент 261 309 адамға салынған.
Аян Бекенұлы
