Нұр-Сұлтанда мұғалімдер, балабақша тәрбиешілері, құқық қорғау органдарының қызметкерлеріне COVID-19 вирусына қарсы екпе салу басталды, деп хабарлайды inbusiness.kz тілшісі елорданың қоғамдық денсаулық сақтау басқармасына сілтеме жасап.
"1 наурыздан бастап Нұр-Сұлтанда коронавирусқа қарсы екпені мұғалімдер, балабақша тәрбиешілері, құқық қорғау органдарының қызметкерлері алады. Бұл топта 15 мыңнан аса адам бар", - деп жазылған.
Елордада бұл санаттағы адамдарға вакцина салу үшін 36 алғашқы медициналық-санитарлық көмек ұйымында екпе егу бөлмелері ұйымдастырылды.
Сонымен қатар бұл вакцинацияға ведомствоаралық ұйымдар да қатысады.
"Амбулаториялық-емханалық көмек көрсететін медициналық ұйымдар мұғалімдер мен тәрбиешілерге екпені білім беру ұйымы бекітілген жері бойынша салады. Вакцина алатындардың тізімдері жасалды. Олар тиісті емханаларға жіберілді", - деп жазылды хабарламада.
Айта кетейік, 1 ақпаннан бастап Нұр-Сұлтанда барлығы 2 126 адам коронавирус инфекциясына қарсы екпе алды.
Өткен демалыс күндері басқарманың қоймасына 7 мыңнан аса вакцинаның жаңа дозасы жеткізілді.
