Елорданың жоғары оқу орындары мен студент жастары арасында өткен "JASTAR JALYNY–2024" студенттік шығармашылық- спорттық фестивалі өз мәресіне жетті, деп хабарлайды inbusiness.kz сайты.
4-14 қараша аралығында өткен студенттердің шығармашылық-спорттық фестивалінде елордалық жастар 10 номинация бойынша бақ сынады. Олар футбол, волейбол, үстел теннисі, шахмат, эстрада, ұлттық би, заманауи би, ұлттық аспаптар, театр, мобилография бойынша сайысқа түскен болатын. Фестиваль Астана қаласының Жастар саясаты мәселелері басқармасының қолдауымен өтті.
Жалпы 10 номинация бойынша ең үздік атанған жоғары оқу орнына бас жүлде – 500 мың теңге табысталды. Фестивальдің конкурстық бағдарламасына Астана қаласының 15 жоғары оқу орны қатысты.
Фестивальге төрелік еткен қазылар алқасы еліміздің ең тәжірибелі мамандарынан жасақталды. Бағдарламаны спорт, мәдениет және өнер қайраткерлері, еліміздің еңбек сіңірген әртістері, кәсіби хореографтар мен бейнеографтар бағалады.
"JASTAR JALYNY–2024" фестивалі жастардың шығармашылық әлеуетін ашу, дарынды жастарды анықтау, дарынды балалар мен ұжымдардың шығармашылық дамуына қолдау көрсету және жағдай жасау, рухани және мәдени әлеуетін дамыту, студенттерге эстетикалық және этикалық тәрбие беру жүйесін жетілдіру, белсенді азаматтық, әлеуметтік жауапкершілік, патриоттық сезім, адамгершілік құндылықтар мен көшбасшылық қасиеттерді арттыру мақсатында өткізіліп келеді.
