Бұл жолы Астанада Шығыс Қазақстан және Абай облыстарының тауар өндірушілері өз өнімдерін ұсынады, деп хабарлайды қала әкімдігінің ресми сайты.
Екі облыстың ауыл шаруашылығы тауар өндірушілері мен қайта өңдеу кәсіпорындары елорда тұрғындары мен қонақтарына жоғары сапалы экологиялық таза өнімдер ұсынатын болады. Өнім ассортименті жалпы көлемі 282 тоннаны құрайтын 70-тен астам атауды құрайды.
Оның ішінде: 91 тонна картоп пен көкөніс, 59,9 тонна бал, 48,8 тонна ет, 17 тонна күнбағыс майы, 13 тонна бақша дақылдары, 8 тонна сүт өнімдері, 7,5 тонна балық өнімдері, 5 тонна құс еті, 5 тоннадан астам қымыз және панты өнімдері, 4 тонна ұлттық тағамдар және 3 тонна шұжық өнімдері.
Сондай-ақ, елорда тұрғындары мен қонақтары үшін концерттік бағдарлама дайындалды.
Жәрмеңкелер әр сенбі және жексенбіде 30 қазанға дейін өтеді. Өтетін орны: Тұран 48 мекен-жайы бойынша орналасқан "Астана-Арена" стадионының жанындағы алаң. Келесі өнімді 8-9 қазан күндері Солтүстік Қазақстан және Ақтөбе облыстарының кәсіпкерлері ұсынады.
