Соңғы күндері қардың толассыз жаууына байланысты қаладағы барлық ауданда коммуналдық қызмет күшейтілген режимде тәулік бойы қызметін атқарып жатыр, деп жазады inbusiness.kz сайты.
Осыған байланысты, Астаналық волонтерлер қар күреу жұмысына жұмылдырылған мамандарға ыстық шай мен бауырсақ таратты. Волонтерлер қаланың барлық аудандарында осындай іс-шара өткізіп жатыр.
"Бізге үнемі қолдау көрсететін волонтерлерге алғыс айтамын. Бүгін міне бәріміз қар күреп жатырмыз, жұмыс өте көп. Осындай жылу сыйлап жатқандарыңыз үшін көп рахмет", - деп жұмысшылардың бірі жастарға алғысын білдірді.
Сондай-ақ, елорда волонтерлері зейнеткерлер мен ерекше қажеттілігі бар азаматтардың үйінің маңын қардан тазартуға жәрдем берді. Мұндай акция қаладағы барлық 5 ауданда басталды. Қысқы маусым басталғанға дейін орталық мамандары аудандық әкімдіктерден көмек қажет азаматтардың тізімін алып, сол бойынша жұмыс істейді. Тіпті кейбір тұрғындар әлеуметтік желі арқылы волонтерлердің көмегіне жүгінеді.
Айта кету керек, бүгін волонтерлер жеке тұрғын үй секторындағы бірқатар үйлердің ауласын қардан тазартты.
Бұдан бөлек, волонтерлер қыс уақытында қар күреумен қатар, тұрақты түрде азық-түлік себеттерін тарату, отын жару және ауа-райы қолайсыз кезде шай ұсыну сияқты көмек көрсетіп тұрады.
Волонтерлердің айтуы бойынша, қайырымдылық акциясы қыстың соңына дейін жалғасады.
