Астанадағы қызылша ауруы туралы қаланың бас мемлекеттік санитарлық дәрігері Сархат Бейсенова айтып берді, деп хабарлайды inbusiness.kz.
Бас қалада қызылшаға қатысты жағдай әлі де тұрақты емес. Жыл басынан бері қалада қызылшаның 2278 бастапқы және 609 расталған жағдайы тіркелді, оның ішінде 14 жасқа дейінгі балалар арасында – 429.
"Өткен баяндамамда атап өткенімдей, ауру ересектер арасында көбейе бастады, онда қарқынды көрсеткіш 25,2%-дан 40,2%-ға өсті. Бұл ретте, жүргізіліп жатқан қосымша жаппай иммундау желтоқсан айымен салыстырғанда 1 жасқа дейінгі, 1 жастағы және 2 жасқа дейінгі балалар арасында сырқаттанушылықтың төмендеуіне әсер етті. Мәселен, 1 жасқа дейінгі балалардың аурушаңдығы 15%-ға, 1 жастағылар 8,5%-ға және 2 жастағы балалар тиісінше 21,3%-ға төмендеді", – деді Сархат Бейсенова.
Ұлттық сараптама орталығының елордалық филиалында жүргізілген зерттеулер қызылша үлгілерінің 100% D8 генотипіне жататынын көрсетті, бұл штамм 1980 жылдары Азияда пайда болды және қазір бүкіл әлемге таралуда. D8 генотипі Еуропада, Азияда және Солтүстік Америкада соңғы 4 жылда шыққан генотиптердің бірі болып саналады.
"Ауа арқылы берілетін жұқпалы аурулардың өсуін назарға ала отырып, жұқпалы аурулардың таралуының алдын алу жөніндегі профилактикалық шараларды күшейту туралы" Қазақстан Республикасының Бас мемлекеттік санитариялық дәрігерінің 2024 жылғы 8 ақпандағы №2 қаулысы шығарылды, оған сәйкес халық көп жиналатын жерлерде медициналық немесе мата маскаларын пайдалану ұсынылады. Атап айтқанда, біз әуежайлар, теміржол вокзалдары, базарлар, сауда-ойын-сауық орталықтары, сауда үйлері, театрлар, кинотеатрлар, ХҚО, банктер туралы айтып отырмыз", – деп толықтырды бас санитарлық дәрігер.
Бұдан өзге ақпан айында коронавирус жұқтырған 25 адам анықталды. Қазір стационарда үш пациент бар, қалғандары амбулаториялық емделуде.
Сондай-ақ, масканы көліктің барлық түрінде тағу ұсынылады: қоғамдық, әуе және теміржол. Сонымен қатар, қала тұрғындары бұқаралық іс-шараларға, әсіресе балалармен қатыспағаны жөн.
