Бәсекелестікті қорғау және дамыту агенттігінің дерегінше, адамның иммун тапшылығы вирусына (АИТВ, ВИЧ) зертханалық диагностика жүргізуге жеке рұқсат беру түріндегі әкімшілік кедергі жойылды.
"2022 жылғы 3 қаңтарда "Қазақстан Республикасының кейбір заңнамалық актілеріне бәсекелестікті дамыту мәселелері бойынша өзгерістер мен толықтырулар енгізу туралы" заң қабылданды. Оған сәйкес "Рұқсаттар және хабарламалар туралы" заңынан АИТВ-инфекциясын диагностикалауға рұқсат беру туралы талап алынып тасталады", – деп жазылған хабарламада.
АИТВ-инфекциясының бар-жоғын анықтау иммунологиялық зерттеулер болып саналады және лицензияланады.
Енді белгілі бір инфекцияны анықтау үшін қосымша рұқсат берудің керегі жоқ.
Нарықтағы жеке субъектілерге АИТВ-инфекциясына зерттеулер жүргізуге қолжетімділікті қамтамасыз ету үшін кедергілерді жою бойынша Бәсекелестікті қорғау және дамыту агенттігі жұмыс жүргізіп жатыр.
АИТВ-диагностикасына жеке санитариялық қорытынды қажеттілігі туралы уәкілетті органның талабы бөлігінде мәселелер қалады.
Айта кетейік, жоғарыдағы әкімшілік кедергі 2010 жылы Денсаулық сақтау министрлігі заңға тәуелді актілерінен жеке зертханалардың АИТВ-инфекциясын зертханалық зерттеу жүргізуге қол жеткізуін көздейтін нормаларды алып тастаған кезде пайда болған еді.
