БҰҰ балалар қоры (ЮНИСЕФ), Санитарлық-эпидемиологиялық бақылау комитеті, Денсаулық сақтау министрлігі Қоғамдық денсаулық сақтау ұлттық орталығы (ДСМ ҚДСҰО), АҚШ Халықаралық даму агенттігінің (USAID) қаржылық қолдауымен жаңа сайт әзірленді. Онда қазақстандықтар СOVID-19-ға қарсы вакцина туралы сенімді ақпарат ала алады. Бірнеше ай бойы MedSupport дәрігерлері мен ғалымдар тобы ЮНИСЕФ-пен бірлесіп, сайтқа деректерді іріктеген.
"Вакцинация көпшілік пен бұқаралық ақпарат құралдарын жиі алаңдатады. Egu.kz сайтының негізгі міндеті – вакциналар туралы толық және сенімді ақпарат беру. Мұнда тұрғындар негізгі сұрағына жауап таба алады", - деді Санитарлық-эпидемиологиялық бақылау комитетінің төрайымы Айжан Есмағамбетова.
ҚДСҰО басқарма төрағасының орынбасары Айнагүл Қуатбаева ата-аналар балаларына екпе салу арқылы жұқпалы аурудың салдарынан қорғайтынын атап өтті.
Қазақстандағы ЮНИСЕФ өкілі Артур ван Дизеннің пікірінше, вакцина – медицинаның ең үлкен жетістігі.
"Екпе алу арқылы сіз өзіңізді аурулардан қорғайсыз. 21 ғасырда кейбір ата-аналар вакцинаның тиімділігіне әлі күмәнмен қарайды. Сондықтан ЮНИСЕФ серіктестерімен бірге бірегей сайт әзірледі. Онда ата-аналар өздерін толғандырған сауалдарға жауап таба алады", - деді Артур ван Дизен.
