Бөлек "Жылу энергетикасы туралы" заң сенат отырысында бірінші оқылымда мақұлданды, деп жазады Inbusiness.kz сайты.
Ең бастысы, жаңа Заң негізінде жылу энергетикасы саласындағы мемлекеттік бақылауды күшейту, бақылаудың жаңа түрлерін енгізу: қашықтықтан, жоспарлы, жоспардан тыс тексерулер, тергеулер жүргізу көзделген.
Жылу энергетикасы саласындағы құзыреттер мен жауапкершіліктер қайта бөлінетін болады.
"Энергетика министрлігіне жылу энергиясын өндіру мен тасымалдау жөніндегі функциялар бекітіледі. Өнеркәсіп және құрылыс министрлігі — тұрғын үй-коммуналдық шаруашылыққа қатысты жылумен жабдықтау жүйелеріне және жаңа жылу желілерін салуға жауапты. Ұлттық экономика министрлігінде тарифтік реттеу мәселелері қалады", — деді сенатор Сағындық Лұқпанов.
Сондай-ақ, орталықтандырылған жылумен жабдықтаудың жылу желілеріндегі бақылау функциялары жергілікті атқарушы органдардан Атом және энергетикалық қадағалау және бақылау комитетіне ауысатын нормалар көзделген.
Сонымен қатар жаңа құралдар – жылумен жабдықтауды дамытудың ұзақ мерзімді және орта мерзімді схемалары мен жылу энергетикасының жай-күйін мониторингілеу енгізіледі. Жылумен жабдықтауды дамыту схемаларын жергілікті атқарушы органдар әзірлейді, мәслихаттар бекітеді.
Жылумен жабдықтау жүйелері үш бағытқа бөлінеді: орталықтандырылған; жергілікті; жеке. Жылумен жабдықтау субъектілерінің меншік иелері объектілердің тиісті жұмыс істеуін қамтамасыз етуге міндетті болады.
Ілеспе Заң қолданыстағы заңнаманы "Жылу энергетикасы туралы" Заңға сәйкес келтіру мақсатында әзірленді және 3 кодекс пен 6 заңға түзетулер енгізуді көздейді.
