Еуропалық Одақ (ЕО) Израиль мен Палестинаның ХАМАС қозғалысы арасындағы қақтығыстың гуманитарлық үзіліс және тұтқындарды алмастыруды көздейтін келісімін құптады. Бұл туралы inbusiness.kz сайты Анадолы ақпарат агенттігіне сілтеме жасап хабарлайды.
"Мен кепілге алынған 50 адамды босатуға, сондай-ақ, соғыс қимылдарын тоқтатуға қатысты қол жеткізілген келісімді шын жүректен құптаймын", - деді Еурокомиссия төрағасы Урсула фон дер Лейен.
Еурокомиссия басшысы дипломатиялық арналар арқылы келісімге қол жеткізуде делдал болған және ол "террорлық" деп атаған палестиналық ХАМАС қозғалысын кепілге алынғандардың барлығын дереу босатуға шақырғандардың барлығына алғысын білдірді.
"ЕО комиссиясы гуманитарлық көмекті Газаға жеткізу үшін осы үзілісті пайдалану мақсатында қолдан келгеннің бәрін жасайды. Мен еурокомиссар Янез Ленарчичтен аймақтағы гуманитарлық дағдарысты жеңілдету үшін Газа секторына жеткізілім көлемін мүмкіндігінше тезірек ұлғайтуды талап еттім", - деп атап өтті Урсула фон дер Лейен.
Сондай-ақ, Еуропалық Кеңестің президенті Чарльз Мишель өз кезегінде ХАМАС пен Израиль арасындағы келісімді құптады.
"Газа секторында кепілге алынған әйелдер мен балаларды босату туралы келісімді құптаймын. Мен бұл келісімге қол жеткізгенім үшін Катар мен Египетке алғыс білдіремін. ХАМАС кепілге алынған барлық адамдарды босатуы қажет. Сонымен қатар, бұл үзіліс гуманитарлық көмекті қажет ететіндерге барынша жеткізу үшін қолданылуы өте маңызды", - деп қосты Мишель.
