Ералы Тоғжанов "Северный Бройлер" ЖШС бройлер құс фабрикасының құрылысымен танысып, жеке қосалқы шаруашылықтарды кооперативтерге біріктіру және ауылдағы ауыл шаруашылығы өндірісін дамыту жобасы туралы айтып берді. Бұл жобаның артықшылығы – кәсіпорын айналасында өндірістік белдеу құру.
"Қарсы міндеттемелер жүйесі арқылы кәсіпкерлер адамдарға нақты көмек көрсетулері тиіс. СҚО-да бизнес пен адамдар арасындағы өзара іс-қимыл тетігін құру қажет, ол бүкіл республика үшін үлгі болады", – деп атап өтті премьер-министрдің орынбасары.
"Северный бройлер" ЖШС басшысы Солтүстік Қазақстан облысына Алматы облысынан келді. Қазақстандық компания 5,4 млрд теңге инвестиция салады. 168 тұрақты жұмыс орны құрылады. Қызметкерлер жергілікті тұрғындар арасынан алынатын болады. Осылайша, ауыл тұрғындары жыл бойы жұмыспен қамтылады.
"Мемлекет қолдау көрсететін кәсіпорындар өздері орналасқан ауылдардың тұрғындарына көмек көрсету бойынша міндеттемелер алады. Атап айтқанда, тұрғындардың қосалқы шаруашылықтарын дамытуға жәрдемдеседі", – деді СҚО әкімі Құмар Ақсақалов.
Айта кетейік, жаңа құс фабрикасының қуаты жақсы. Мұнда 5 мың тонна құс еті өндірілетін болады. Жалпы облыс бойынша жылына 16 мың тонна құс етін өндіретін үш құс фабрикасының құрылысы жүргізіліп жатыр. Бұл өңірдің құс етіне деген қажеттілігін жабуға мүмкіндік береді.
Сонымен қатар Ералы Тоғжанов Петропавлдағы фанера комбинатының өндірістік үдерісімен танысты. Жобаны түрік инвесторлары іске асырды, 4,1 млрд теңгеден астам инвестиция салынды. Зауыттың жобалық қуаты – 30 мың текше метр ламинатталған фанера. Кәсіпорын ел бойынша фанераға қажеттілікті 22%-ға дейін жаба алады. 210 тұрақты жұмыс орны құрылды.
Іссапар аясында ҚР Премьер-Министрінің орынбасары Ералы Тоғжанов "Жүкенов" ЖК тігін цехына барды. Цехта көпбалалы, қандастар және толық емес отбасылар үшін 9 жұмыс орны құрылған. Қосымша 40 жаңа жұмыс орнын ашу жоспарлануда.
Жалпы өңірде 17 сүт фермасының, үш құс фабрикасының, жылыжай кешенінің және май экстракциялық зауытының құрылысы жүріп жатыр. Биыл кірпіш зауыты, темірбетон бұйымдары кәсіпорны, ірімшік шығаратын сүт зауыты ашылды. Қағаз өнімдері фабрикасы мен автоклавты газоблоктар кәсіпорнын іске қосу көзделген.
ДСП, электр қалқаны жабдықтарын және жеңіл болат жұқа қабырғалы конструкцияларды шығару бойынша инвестициялық жобалар іске асырыла бастайды.
Биыл СҚО-да 401 мың шаршы метр тұрғын үй пайдалануға беріледі. 663 км жол жөнделеді, осы мақсаттарға 22 млрд теңге жұмсалды. Сумен жабдықтау саласында жөндеу жұмыстарымен 55 ауыл қамтылды.
