12-13 сәуірде Ұлттық банк төрағасы Ерболат Досаев бастаған делегация Халықаралық валюта қорының және Дүниежүзілік банк тобының басқарушылар кеңесінің Көктемгі кездесулеріне қатысу үшін Вашингтонға сапармен барды, деп хабарлайды бас банктің баспасөз қызметі.
Сапар шеңберінде Ұлттық банк төрағасы ХВҚ басқарушы директоры Кристин Лагард ханыммен, ХВҚ басқарушы директорының орынбасары Тао Чжан мырзамен және Таяу Шығыс және Орталық Азия елдері департаменті басшылығымен кездесулері өтті.
Басқарушы Директормен кездесу барысында тараптар ынтымақтастық мәселелерін талқылады, әлемдегі ағымдағы қаржы-экономикалық жағдай туралы пікір алмасты, сондай-ақ Астана экономикалық форумы шеңберінде Нұр-Сұлтан қаласында 2019 жылғы 16 мамырда өтетін ХВҚ басшысының алдағы сапарын және Кавказ және Орталық Азия елдері қаржы министрлері мен орталық банктері басшыларының дөңгелек үстелін өткізуді талқылады.
Ұлттық банктің делегациясы ХВҚ Халықаралық валюта және қаржы комитетінің жалпы отырысына, Кавказ және Орталық Азия елдері қаржы министрлері мен орталық банктері басшыларының дәстүрлі кездесуіне, сондай-ақ ХВҚ Швейцария Кіші тобының отырысына қатысты.
Бұдан басқа, ХВҚ алаңында екіжақты ынтымақтастық мәселелерін талқылау үшін Ерболат Досаевтың ЕҚДБ президенті Сэр Сума Чакрабартимен, БАӘ Орталық банкінің төрағасы Мубарак Аль Мансуримен, Швейцария Орталық банкінің төрағасы Томас Йорданмен, Грузия Ұлттық банкінің төрағасы Коба Гвенетадземен, Армения Республикасы Орталық банкінің төрағасы Артур Джавадянмен, Goldman Sachs Group Президенті Джон Уолдронмен, Балама инвестициялар стандарттары бойынша кеңестің аға кеңесшісі Сэр Эндрю Ларджбен екіжақты кездесуі өтті.
