Ерболат Досаев қыркүйек айының соңына дейін Жетісу ауданындағы Эйхе көшесінің бойындағы жол жабынындағы ақауларды жоюды тапсырды.
"Мен 1994 жылдан бері жылжымайтын мүлік иелері қауымдастығының төрағасымын. Жер шұңқыр, үйге кіретін жол жоқ. Шілде айында шұңқырды жамап, тегістеп береміз деп уәде бергенсіздер. Емін-еркін жүріп-тұру үшін жолды жөндеп беруіңізді сұраймын", –деді Жетісу ауданының тұрғыны әкіммен кездесуде.
"Өкінішке қарай, Жетісу ауданында өз жұмыстарын сапасыз орындайтын мердігерлердің белгілі бір тізімі бар. Солардың бірі - "Сұңқар" ЖШС. Оларды сапасыз жұмыстарын қалпына келтіруге мәжбүрлейміз. Мен әкімдікке сіз айтқан мекенжай бойынша тапсырма беремін. Біз қыркүйек айының соңына дейін жұмысты аяқтауға тырысамыз: оны мүмкіндігінше ыңғайлы етіп жасаймыз және қыста ешқандай проблема болмайды", – деді Досаев.
Бұған дейін, баяндама барысында мегаполис әкімі биыл Жетісу ауданында 18 көшеде 22 шақырым жолға орташа жөндеу жұмыстарын жүргізу жоспарланғанын хабарлады. 4 көшеде (Омаров, Қазыбаев, Қожамияров, Қазыбаев көшесі) жол жөндеу жұмыстары ағымдағы жылдың қыркүйек айында аяқталады, қалған 14 көше ағымдағы жылдың қазан айында аяқталады. Қазан айының соңына дейін ағымдағы жөндеумен тағы 7 мың м2 қамтылады.
