Қала тұрғыны шаһар басшысынан: "Алматыда Екібастұздағыдай жылу жүйелерінің өшіп қалу қаупі бар ма?" - деп сұрады.
Алматы әкімі Екібастұздағыдай жағдайды болдырмауға және ол үшін қолынан келгенін жасап жатқанын айтты.
"Біз қыс мезгіліне қағаз жүзінде емес, өте қарқынды дайындалдық. Жақында Мемлекет басшысы мен Премьер-министрден энергетика жүйесіне ревизия жүргіземіз деген тапсырма келді. Жұмыс 1 желтоқсанда басталады", - деді Ерболат Досаев.
Әкім құзырлы органдар екі апта ішінде 1-15 желтоқсан аралығында жылу желілері мен қазандықтарды қосымша тексеруден өткізетінін жеткізді.
"Әзірге апатқа алғышарттар жоқ деп үміттенемін. Жақында Гоголь көшесіндегі жағдай болды, желілер тозған, бірақ Алматы мұндай жағдайға дайын" - деп мәлімдеді Досаев тұрғындармен кездесуде.
Әкім жаз мезгілінде қондырғылар ауыстырылып, дайындалып, реттеліп, қазандықтар тазартылғанын жеткізді.
