"Жаңа жүйе сақтандыру сыйақысын 50% көлемінде субсидиялауды көздейді. Жүйеге сақтандыру жағдайы басталған кезде төлем кепілдігін қамтамасыз ететін халықаралық қайта сақтандыру компаниялары тартылды", – деді Сапархан Омаров.
Министрдің айтуынша, сақтандырудың жаңа жүйесі негізінде өсімдік шаруашылығы саласындағы сақтандыру өнімдері және алғаш рет мал шаруашылығында ірі қара малды сақтандыру шарты бекітілді.
"Бұл – мультитәуекелді өнім. Тәуекел қатарына инфекциялық және аса қауіпті аурулар, өрт, үшінші тұлғалардың қаскүнемдік әрекеті, қауіпті табиғи құбылыстар, сондай-ақ жазатайым оқиғалар – жарылыс, найзағайдың түсуі, тұншығу, жануарлардың шабуыл жасауы сынды тосын жайттар мен оқыс оқиғалар енді", – деді ауыл шаруашылығы министрі.
Сапархан Омаровтың сөзінше, 2020 жылғы көктемгі дала және егін жинау барысында астық егілетін 6 өңірде 115 мың гектар дәнді және майлы дақыл сақтандырылды. Сақтандыру жағдайының тууына байланысты
518,2 млн теңге төленді.
"Мал шаруашылығы саласында да 2 117 бас ірі қара мал сақтандырылды. Бұл бағытта сақтандыру жағдайы тіркелген жоқ", – деді министр.
Қанат Махамбет
