Солтүстік Қазақстан облысы Тоқсан би ауылының маңында Есіл өзені бір тәулікте 119 см-ге көтерілді, деп хабарлайды inbusiness.kz сайты.
"Қазгидромет" РМК СҚО филиалының мәліметінше, Ғабит Мүсірепов атындағы Тоқсан би ауылының маңынан өтетін Есіл өзенінің деңгейі соңғы 2-3 күнде 3 метрден артық көтерілген. Бұл жерде мұз көтеріліп, қозғалды.
Есіл өзені төмен қарай Шал ақын ауданының Крещенка елді мекенінің маңында бірден 30 см-ге көтерілді. Мұнда су мұз үстіне шықты.
Покровка елді мекені маңында 11 см-ге, Долматово ауылының жанында өзеннің су деңгейі 14 см-ге өзгерген.
Сергеев су қоймасында да өзгеріс бар, бір тәулікте 19 см-ге артып, күн жылынғалы су деңгейі 43 см-ге көтерілген. Қазір бөген 89 % толық.
Өңірдегі шағын өзендердің де суы көтеріліп келеді. Мәселен, Возвышенка елді мекені маңындағы Ақанбұрлық өзенінің деңгейі бір тәулікте 29 см-ге, наурыз айының соңынан бастап 2 метрге толыққан. Бірақ әзірге қауіпті деңгейге жеткен жоқ.
