Bloomberg агенттігінің дерегі бойынша, Лондондағы ICE Futures биржасында 2019 жылдың қарашасындағы жеткізіліммен Brent сұрыпты мұнай фьючерсі 0,5 пайызға көтеріліп, баррелі 62,87 доллар болды.
Ал Лондон және Нью-Йорк биржаларында қазандағы жеткізіліммен, электрондық сауда барысында WTI маркалы жеңіл мұнай фьючерстері 0,5 пайызға қымбаттап, барреліне 58,14 долларды құрады.
Вашингтон мен Бейжің арасындағы сауда тартысының кесірінен мұнай құны сәуір айынан бері 10 пайызға кеміген. Халықаралық энергетика агенттігі мұнайға деген әлемдік сұраныс өсіміне қатысты болжамды төмендетіп отыр. Energy Aspect сарапшыларының пікірінше, сауда дауы салдарынан шикізаттың бір баррелі15 долларға азайған.
Mitsubishi UFJ Research and Consulting экономисі Томомичи Акутаның болжамынша, алдағы алты айда мұнай құнының ауытқу шегі 50 доллар төңірегінде болуы мүмкін.
Табиғат Нұрболат
