Еуропалық комиссия 24 қаңтар күні жарияланған жаңа депортация стратегиясы арқылы ЕО-да заңсыз мигранттардың көбеюімен күрескісі келеді, деп жазады inbusiness.kz.
"Халықаралық қорғауды қажет етпейтіндер туған елдеріне оралуы керек", - деді Брюссельде ЕО ішкі істер комиссары Илва Йоханссон.
Оның айтуынша, 2022 жылы ЕО аумағына 300 000-нан астам заңсыз мигрант келген. Олардың көпшілігі қауіпсіз пана іздеген саяси босқындар емес.
Депортацияның жаңа стратегиясы "қауіпті әрі заңсыз көші-қонды азайтуға көмектесетін тосқауыл болуы керек", - делінген Еурокомиссияның мәлімдемесінде. Стратегия ЕО-ға мүше мемлекеттер арасындағы тығыз ынтымақтастықты, деректермен алмасу мен шешім қабылдаудың жеделдетілген процестерін көздейді.
Сонымен қатар, Еурокомиссияда ЕО-мен ынтымақтастық орнатылған және бұл үшін "саяси кедергілері жоқ" елдерге мигранттардың қайтып келу санын көбейту күтілуде.
