Еуропа футбол федерациялары қауымдастығы (УЕФА) құрамына кіретін әрбір федерацияға қосымша 1 млн еуродан инвестиция салатын болды. Бұл туралы ұйымның ресми сайты хабарлады, деп хабарлайды baq.kz.
УЕФА президенті Александер Чеферин Хельсинкиде өткен конгресте болашақта қаржыландыру жалғасатынын айтты. Өткен жылы ЕУРО-2016 турнирі үлкен қаржылық табысқа кенелген. Соған байланысты осындай ірі додалардан түскен пайда федерацияларға көмектесіп тұру үшін қарастырылып отыр.
"Біз биылғы циклде УЕФА-ға мүше әрбір федерацияға қосымша 1 млн еуродан бөлу туралы шешім қабылдадық. Мұндай көмек УЕФА аясында өтіп жатқан турнирлердің қаржылық табысының жоғарылауынан болып отыр", – дейді Чеферин.
Айта кетейік, УЕФА-ға 55 ел мүше. Оның арасында Қазақстан да бар.
