Германияда бағаның өсуі соңғы 30 жылдағы ең жоғары деңгейге жетті, деп хабарлайды Inbusiness.kz Bloomberg агенттігіне сілтеме жасап.
Қыркүйек айында Еуропаның негізгі экономикасы саналатын бұл елде инфляция 4,1%-ға дейін өсті.
Бұған энергетикалық дағдарыс себеп болып отыр. Еуропадағы электр энергиясының құны Ресей мен Норвегиядан жеткізілетін газ мөлшерінің азаюы, сондай-ақ сұраныстың артуы салдарынан қымбаттады. Тұтыну тауарлары бағасының шарықтауына жергілікті локдаундтар кесірінен жеткізілімнің кешіктірілуі әсер етті.
Еуропаның басқа елдерінде де инфляцияның деңгейі рекордтық көрсеткішке ие болды.Мәселен, Францияның көрсеткіші 2,7%-ды құрады. Италияда инфляция 4%-ға өсті. Бірқатар экономист Еуроодақта бағаның өсу қарқыны қыркүйекте 3,3%-ға артады деп отыр.
Еуропадағы газ бағасы да рекордтық деңгейге жетті. 30 қыркүйекте мың текше метр құны 1098 доллар болды. Алдыңғы сауда сессиясының жабылу деңгейімен салыстырғанда бұл көрсеткіш 2,9%-ға артық.
Табиғат Нұрболат
